२०८२ मंसिर १४, आईतवार १८:५८
आगामी फागुन २१ गतेका लागि तय भएको प्रतिनिधि सभा सदस्य निर्वाचनमा मतदाताको पहुँचलाई सरल, सहज र व्यवस्थित तुल्याउन निर्वाचन आयोगले देशभरका मतदानस्थल पुनरावलोकन गरेको छ ।
आयोगको आइतबारको निर्णयअनुसार मतदाताको सुविधाका लागि देशभर १६८ वटा नयाँ मतदानस्थल थप गरिएको छ भने अपायक, जीर्ण, प्रयोगमा नरहेका वा सञ्चालनयोग्य अवस्थामा नभएका ९३ वटा मतदानस्थल खारेज गरिएको छ ।
मतदानस्थल पुनरावलोकनपछि साविकमा कायम १० हजार ८९२ मतदानस्थलमा जम्मा ७५ मतदानस्थल थप भई देशभर १० हजार ९६७ मतदानस्थल कायम गरिएको आयोगले जनाएको छ ।
पुनरावलोकनका क्रममा मतदानस्थलको नाम र ठेगानामा रहेका त्रुटि सच्याउने, मतदातालाई पायक पर्ने स्थानमा आंशिक वा पूर्ण रूपमा स्थानान्तरण गर्ने, साविककै अर्को मतदानस्थलमा समायोजन गर्नेलगायतका कार्य सम्पन्न गरिएको जनाइएको छ ।
मतदानस्थल पुनरावलोकन कार्यमा सहयोग र समन्वय पुर्याउने वडा तह, जिल्ला तह र केन्द्रीय तहमा रहेका समिति, सबै राजनीतिक दल तथा सरोकारवालाप्रति आयोगले हार्दिक धन्यवाद ज्ञापन गरेको छ । आयोगले निर्वाचनलाई थप सहज र विश्वसनीय बनाउन सो पुनरावलोकन महत्वपूर्ण कदम भएको पनि उल्लेख गरेको छ ।
